ساء الخير يادكتور/خليل... 
مش عارفه ابدا كلام منين بس لازم ابدا 
انا هعرفك بنفسى الاول علشان تحاول تجمع معلومات وتربطها ببعض ..الخ 
انا طالبه فى السنه النهائيه ان شاء الله من كليه 
الخدمه الاجتماعية جامعة حلوان عندى 20 سنه 
المشكله من زمان من ساعة ماكنت عندى حوالى 8 سنين كان علاطول بابا مسافر وماما هى اللى عايشه معانا طبعا وهو فى السفر ولما بابا كان ينزل فى الاجازات كان هو وماما يتخانقوا وبابا ساعات كان ممكن يخنق ماما ادامنا واحنا اطفال!!!! المهم فى الاخر احنا 3اخوات و انا منهم ...سافرنا مع بابا وهو طلق ماما واحنا مسافرين من غير مايعرفنا بس احنا كنا حاسين 
بعد كده نزلنا مصر لاقينا عمتى فى البيت بابا مكنش نزل معانا عاملتنا باسلوب بشع وكانت تبعت لبابا جوابات تشتكيله مننا مع انى كنت فى اولى اعدادى يعنى عيال وعادى لو غلطنا مش بيقولوا عيال وغلطوا 
انا مش عارفه ليه انا عماله اطول بس انا هحاول ادخل فى الموضوع انا اسفه 
المهم جيت لحد ماوصلت ل2 ثانوى تعبت ساعتها وجالى اكتئاب حاد وده كان تشخيص د/ سعيد عبد العظيم 
وفضلت اخد فى ادويه ولغاية يومنا هذا لسه باخد الادويه دى...يعنى انا ساعتها كان عندى 15 سنه وشهر ودلوقتى انا عندى 21 سنه الا اسبوع وشويه 
الاعراض اللى كانت عندى وانا شاكه اساسا ان ده كان اكتئاب 
وياريت تكون صريح معايا متخافش على شعورى ولا اى حاجه من الكلام ده عادى يعنى هو مش السرطان 
1- عدم النوم 
2- البكاء المستمر 
3- هلاوس بصريه وسمعيه 
4- التفكير بافكار غير منطقيه 
5- الخوف المستمر من كل من حولى 
6- عدم امكانية التعرف على من حولى بالرغم من وجود شىء بداخلى يقول لى انهم اهلى 
7- عدم معرفة التفريق بين الناس من هم ابى ام امى ام اختى ام اخى 
8- عدم معرفة الوصول للبيت والشك بان كل الناس تترقبنى 
9-فقدان الشهيه ونقصان ملحوظ فى الوزن 
ــــــــــــــــــــــــــــــــــــــــــــــ 
بعد ما خفيت من الاكتئاب هما قالو لى انى قعدت فى الموضوع ده شهر لغاية ما رجعت لطبيعتى 
انا فاكره كمان انى لما كنت بجى اضحك مبقاش عايزه اضحك بس بدارى خيبتى بالضحكه ده بعد ماخفيت مباشرة كنت بضحك علشان احاول اعمل نفسى عادى وكانت كل ملامح وشى بتقول ان ده ابعد ما يكون عن الضحك حتى بابا كان بيتنرفز منى لما اضحك بالطريقه دى 
 
المهم بعد ماخفيت فى 3 -2001 
حصلى انتكاسه فى 2-2002 
 
ومن ساعتها وانا برضو ماشيه بالدوا 
انا باخد الادويه دى 
prainil c_ rقرص ونص 
akenitonنص قرص 
clopixol depot injection مره كل 3 اسابيع او شهر 
 
مع العلم انى مرحتش للدكتور من اكتر من سنتين وده طبعا علشان بابا عايز يوفر انا اخر دكتور بتعامل معاه اللى مرحتلوش من سنه ونص ده اسمه مصطفى فى ابو العزايم 
 
ملخص المشكله 
{تمنى الموت.عدم ثقه بالنفس.جبن .كره الاولاد نتيجة لانى كنت مستعجله اوى انى ارتبط علشان اخرج من البيت ومحدش حاول يرتبط بيا مع انى مش وحشه شكلا.كره للحياه.عدم امكانية او عدم الرغبه فى استمرار اى علاقه اقوم بها سواء اصدقاء او جيران اى شىء او حتى حبيب..يعنى مثلا انا حبيت واحد مثلا اقعد احب فيه مع نفسى ولو حسيت انه عرف اعامله وحش ولو حاول يتقربلى اعالمه وحش بحس انى عايزه اخليه يجى لغاية عندى يمكن علشان اثبت لنفسى انى مش فيا حاجه مختلفه عن الناس التانيه واول ما يجى اهرب منه 
مجنونه.علاطول حزينه وبحاول اندمج مع الناس بس مش قادره} 
ياررررررررررررررررررررررررررريت تقول لى على حل سريع لانى سمعت من دكتور بيقول ان الشخصيه بتتكون من سن 15 لحد 25 
يعنى من اول ما انا تعبت وانا خلاص يعنى مش فاضلى غير كام سنه ومش هقدر اغير شخصيتى لو ملحقتش نفسى من دلوقتى 
بس ياريت تقول لى حلول عمليه اقدر اعملها مش كلام نظرى 
اسفه للاسلوب السىء فى الحديث بس انا مش عارفه اعبر 
واسقه للاطاله 
ياريت تقول لى على حل 
ولك جزيل الشكر والاحترام وطبعا التقدير لقراءتك للموضوع وان شاء الله لردك كمان

الجواب :

أولاً: لا يوجد شيء أسمه حلّ سريع

أنت ضحية لظروف حياتية سلبية صعبة

لا يمكننى التشخيص من على بعد، لابد أن يكون وجهاً لوجه

ممكن جداً شخصيتك تتغير قوى

الحمد لله وعلى مدى 30 سنة تعاملت مع ناس أكثرهم فى مثل حالتك وسنك لأن الأمر يحتاج إلى:

تقييم وتشخيص وتحديد للحالة

خطة واستراتيجية للحل والعلاج وإعادة بناء الشخصية، ترميم وتقوية الأنا

أنا ما عنديش لا حلول عملية ولا كلام نظرى لكن الحلّ العملى الأمثل الوحيد هو أن نراك الأول وبعدين نحدد، جلسات نفسية فردية، سيكودراما، وأمور أخرى لا أعرفها الآن لأنى لا أعرفك

برجاء الاتصال بالعيادة إذا رغبت لحجز موعد

ت: 24023366 أو 22604009

ما عدا الخميس والجمعة (أجازة) أى من السبت للأربعاء من الساعة 11 صباحاً حتى الساعة 11 مساءاً

د. خليل فاضل